Judg 4 | ZomZIV | STEP | Ehud a sih khit ciangin, TOPA mitah Israel-te a sia-in gamta leuleu uh hi.

Judges 4

Deborah

1 Ehud a sih khit ciangin, TOPA mitah Israel-te a sia-in gamta leuleu uh hi. 2 Tua ciangin TOPA in amaute Hazor a kumpi a sem Canaan kumpi khat Jabin khutah a zuak hi. A galkap mangpa Sisera hi a, Harosheth Haggoyim ah a teng hi. 3 Amah in sik sakolleng zakua nei-a, kum sawmnih sung Israel-te khelbawlin nengniam ahi manin amaute in TOPA huh ding a ngen uh hi. ^a

4 Tua hunin Lappidoth’ zi kamsangnu Deborah in Israel a makaih i hi. 5 Amah in Ephraim mualtung gam sung Ramah le Bethel kikal Deborah Nisuh nuai thukhen zumin nei-a, kitotna thukhen ding a nei Israel-te ama kiangah a pai uh hi. 6 Tuanu in Napthtali-a Kedesh panin Abinoam’ tapa Barak vaikhak a, “TOPA, Israel Pasian in nang hong sawla: ‘Pai-in, Naphtali le Zebulun mite tulsawm tonpih inla Tobar Vum lam zuatpih in. 7 Keimah in Jabin galkap mangpa Sisera, a sakollengte le a galkapte tawh Kishon Gun ah ka zol dinga na khutah kong pia ding hi,’ ci hi,” a ci hi. ^b

8 Barak in tuanu kiangah, “Nong zuih leh ka pai dinga nong zuih kei leh ka pai kei ding hi,” a ci hi.

9 Deborah in, “Hoih mahmah hi, kong zui ding hi. Ahi zongin TOPA in numei khat khutah Sisera pia ding ahi manin hih a na pai nadinga pahtawina nang aa ahi kei ding hi,” a ci hi. Tua ciangin Deborah in Kedesh ciang Barak a zui hi; 10 amah in tua lai-ah Zebulun le Naphtali a sam hi. Amah mi tulsawm in zui-a, Deborah in zong a zui hi.

11 Tu-in Ken-te khat Heber in Moses sungpa b Ken-te khat mah Hobab nusia-in Kedesh kiang Zaanannim - a singkungpi gei ah a puanbuk a zal hi.

12 Amaute in Sisera kiangah Abinoam’ tapa Barak Tabor Vumah paito khin hi, ci-a a gen uh ciangin 13 a sik sakolleng zakuate le amah tawh a om khawmmite Harosheth Haggoyim panin Kishon gun ah a kaikhawm hi.

14 Tua ciangin Deborah in Barak kiangah, “Pai ta ou! TOPA in Sisera na khut sungah hong piak ni tuni ahi hi. Na ma ah TOPA pai khin hi lo hiam?” a ci hi. Tua ciangin Tabor Vum ah Barak paisuk a, mi tulsawm in a zui uh hi. 15 Barak in a nawk ciangin TOPA in Sisera le a sakolleng le a galkapte khempeuh namsau-in delhkek-a, a sakolleng nusia-in Sisera a khe-in a tai hi. 16 Ahi hangin Barak in sakollengte le galkapte Haroseth Haggoyim dong a delh hi. Sisera galkapte khempeuh namsau-in puk uh a; mi khat beek a suakta kei hi. ^c

17 Ahi hangin Sisera a khe-in tai a, Ken-te Heber’ zi Jael puanbuk ah a tung hi, bang hang hiam cih leh Hazor kumpipa Jabin le Ken-te Heber bawng’in kihotheihna a nei uh hi.

18 Sisera dawnin Jael pusuakkhia-a ama kiangah, “Ka topa aw, hong pai-in a sungah tum in. Lau kei in,” a ci hi. Tua ciangin amah tuanu buk ah tum a, amah a tungah khuhna khatin a khuh hi.

19 Amah in, “Ka dangtak hi, tui tawm hong pia in,” a ci hi. Tuanu in nawitui koihna savun-umin a dawn ding pia-a a khuhcip hi.

20 Amah in, “Puanbuk kongah ding inla mi khatpeuh hong pai-in, ‘Hiah mi khatpeuh a om na?’ hong cih leh, ‘Om kei!’ ci in,” a ci hi.

21 Ahi hangin Heber’ zi Jael in puanbuk khetphim khat le sek khat la-a, gimlua-a a ihsip ciangin a kiangah damtakin a pai hi. A panggui-ah khetphimin lei tawh khencip-a, a si hi.

22 Sisera a nungdelh Barak tua munah tunga Jael in amah a na dawn hi. Tuanu in “Hong pai in, na mi zon kong lak ding hi,” a ci hi. Tua ciangin amah tuanu tawh buk sungah luta, tua lai-ah Sisera a panggui-a puanbuk-khetphim ki-khenletin a sisa-a lum a mu hi.

23 Tua ni-in Pasian in Canaan-te kumpipa Jabin, Israel-te a nuaisiahsak hi. 24 Tuateh Canaan-te kumpipa Jabin a siatsak matengin Israel-te khut a khauh semsem hi. ^d